Téng lé-pài-sì (6 goe̍h 13), Hô Phè-chin tāi-piáu Pak Ka-Chiu Tâi-oân Ha̍k-hāu kap Keng-lâm Su-Īⁿ tī North American Taiwan Studies Association ê hōe-gī tiàm soaⁿ-téng kap ha̍k-seng/ha̍k-chiá hun-hióng chit kúi nî Tâi-oân Ha̍k-hāu khui Tâi-gí khò-têng kà Tâi-gí ê sêng-kó kap khùn-lân, iáu-koh ū sòa-lo̍h-lâi beh chò ê tāi-chì lâi kè-sio̍k tī hái-gōa thui-sak Tâi-gí.

Gún ê panel lēng-gōa ū 2 ê káng chiá. Kò͘ Pah-lí (Cornelius Kubler) kàu-siū hun-hióng i tī Williams College kà Tâi-gí ê keng-giām kap i tī Phêⁿ-ô͘ chò ê Tâi-gí thoân-sêng gián-kiù kiat-kó. Paul Ueda kóng Tâi-gí tī AI chit ê sin sè-kài bo̍k-chêng ê chōng-hóng. Chin hoaⁿ-hí ū chit ê ki-hōe kap ta̍k-ke hun-hióng kau-liû. Hi-bāng ē ū jú lâi jú chē lâng chò-tīn lâi kà Tâi-gí o̍h Tâi-gí!